ភ្នំពេញ៖ អ្នកនាំពាក្យ គ.ជ.ប លោក ហង្ស ពទ្ធា បានលើកឡើងនៅក្នុងសន្និសីទសរុបព្រឹត្តិការណ៍ឃោសនាបោះឆ្នោតនាថ្ងៃទី២១ ខែកក្កដា ថាការឃោសនាបោះឆ្នោតរបស់គណបក្សទាំង១៨ រយៈពេល ២១ថ្ងៃកន្លងទៅនេះ គឺប្រព្រឹត្តិទៅដោយរលូន មានសណ្តាប់ធ្នាប់ សុវត្ថិភាព និងគ្មានអំពើហិង្សាកើតឡើងនោះឡើយ។
លោក ហង្ស ពទ្ធា បានបញ្ជាក់ថា រយៈពេលឃោសនា២១ថ្ងៃកន្លងទៅនេះមានគណបក្សចំនួន១៦ ដែលបានរៀបចំដង្ហែក្បួនឃោសនាតាមបណ្តារាជធានីខេត្ត ដោយឡែកគណបក្សចំនួន ២ទៀតគឺធ្វើការឃោសនាបោះឆ្នោតតាមរយៈចែកលិខិតប័ណ្ណគោលនយោបាយ។
លោកបញ្ជាក់ទៀត រដូវកាលឃោសនាបោះឆ្នោតអាណត្តិទី៧នេះ មានសមាជិក សមាជិកាមកពីគណបក្សទាំងអស់សរុបចំនួន២លាន២សែននាក់ដែលបានចូលរួមឃោសនាបោះឆ្នោតទូទាំងប្រទេស ដោយប្រើមធ្យោបាយឃោសនាតាមរថយន្តចំនួនជិត ១០ម៉ឺនគ្រឿង ម៉ូតូជាង៧២ម៉ឺនគ្រឿង កង់ជាង ១ម៉ឺនគ្រឿង និងតាមមធ្យោបាយផ្សេងៗទៀត។
បើតាមអ្នកនាំពាក្យគ.ជ.ប ក្នុងចំណោមគណបក្សទាំង១៦ គឺមានគណបក្សប្រជាជនកម្ពុជាដែលមានការរៀបចំដង្ហែក្បួនឃោសនាក្នុងទ្រង់ទ្រាយធំជាងគេ។
លោកបានលើកឡើងថា អាជ្ញាធរគ្រប់បណ្តារាជធានីខេត្តទាំងអស់បានចូលរួមសហការជាមួយគណបក្សនយោបាយគ្រប់ទាំងអស់ក្នុងការសម្របសម្រួលការដង្ហែក្បួនឃោសនាដោយមិនប្រកាន់និងរើសអើងគណបក្សណាមួយឡើយ៕
